Über uns

Obschon Wimmis eigätlich nid genau än eigeti Fasnacht het si mär stolz druf eini vo dä ältischte Guggene im Bärner Oberland ds sy. Ja wieso gits de üs überhoupt? Vor langer Zyt hets ds Wimmis äs Bruchtum ir Winterszyt gäh, wies äs ähnlich o a andere Orte im Bärner Oberland öppä ds Interlake oder im Meiringe obä gyt. Bi üs heisst dä Bruch "Pöögglete". Chinder zieh am 2. Jänner vo Hus zu Hus einzeln oder i chlinä Gruppe u mache irgend ä churzi Darbietig. Si si derzue verchleidet u mä seit nä äba "Pööggle". Tönt ja eigetlich o scho chli wie Fastnacht oder?

Wüll de die alte doch öppe o no chli ä luschtigi Zyt hei wölle ha, hei disi du där 1. Januar am Aabe för näs luschtig Tribe usgwählt. Gäld isch nid so viu umä gsi u scho gar nid äs Fasnachtskostüm. Däm Feschtli het mä halt de "Hudlete" gseit u mir Wimmiser sy stolz druf, die erschti Fasnacht im Jahr chönne ds präsentiere. Ä Umzug gits doch o geng u dä isch gar nid so vo schlächte Eltärä, bringä mär doch am 1. im Jahr am Namittag sächs Vereinä us äm Näscht plus Treichler u Guggene so viu wie wei mitmache! U aaschliessend de no ä Chindernamittag mit ämänä Heidäklamauk im Singsaal.

Numä am Name "Schattepööggle" hei säch aui geng chli schwer ta. Dä isch irgend ä Synthese us Wimmiser Schatte u däne Fastnachtspööggle vom zwöite Jänner. Schribe tuet mäs us däm Grund äbe mit ämänä starche 'P' u de gra zwene 'ö' u zwene 'g'.